الشروط والخصوصية
آخر تحديث: 6 نوفمبر 2026
الصفحة دي فيها الشروط اللي بنشتغل بيها في Travel Buddies بالعربي، وإزاي بنتعامل مع الإلغاء والاسترداد، وإيه اللي بنعمله ببياناتك. «التجربة» هنا معناها أي حاجة بننظمها: رحلة، أو خروجة، أو أي نشاط تاني.
1. التسجيل والقبول
- التسجيل في أي تجربة بيكون على صفحتها على Luma. التسجيل لوحده مش حجز.
- الفريق بيراجع طلبات التسجيل ويقبل حسب الأماكن المتاحة وطبيعة التجربة. لو الأماكن خلصت، بتقدر تسجل في قايمة الانتظار.
- مكانك بيتأكد لما تتقبل على Luma وتدفع العربون، والفريق يراجع التحويل ويبعتلك إيصال.
2. الدفع
- الدفع بيكون من صفحة tba.eg/pay بانستاباي أو محفظة موبايل، أو عن طريق منصة Geidea، أو بأي طريقة تانية الفريق يتفق عليها معاك أو نضيفها بعد كده.
- السعر والعربون ومعاد دفع الباقي مكتوبين في صفحة كل تجربة. الأسعار بالجنيه المصري، وبعض تجارب بره مصر بيبقى ليها جزء بالدولار مكتوب في الباقة.
- كل دفعة بتاخد رقم إيصال بيبدأ بـ TBA-، وبيوصلك على الإيميل. احتفظ بيه.
- لو باقي المبلغ ماتدفعش في معاده، هنتواصل معاك الأول، ولو ماوصلناش لحل ممكن المكان يروح لحد على قايمة الانتظار.
3. الإلغاء والاسترداد
مفيش قاعدة واحدة لكل التجارب، لأن كل تجربة ليها ظروفها:
- جزء من فلوس أي تجربة بيتدفع بدري لحجوزات زي النقل والإقامة والتذاكر. في حجوزات من دي بنقدر نسترد فلوسها، وفي حجوزات مش بتترد.
- عشان كده، لو اعتذرت عن تجربة، الفريق بيتواصل معاك ويوضحلك إيه اللي نقدر نرجعه، وإزاي: فلوس، أو رصيد لتجربة تانية، أو تدي مكانك لحد تاني بعد موافقة الفريق.
- لو التجربة ليها شروط إلغاء خاصة، بتبقى مكتوبة في صفحتها أو بتوصلك قبل ما تدفع.
- كل ما تبلغنا بدري، كل ما نقدر نرجعلك أكتر.
لو التجربة اتلغت من عندنا
لو احنا اللي لغينا التجربة، بترجعلك فلوسك اللي دفعتها كاملة، أو تنقلها لتجربة تانية لو تحب.
لو حصل تغيير غصب عننا
الجو، أو قرارات رسمية، أو ظروف أمان، ممكن تخلينا نغير المواعيد أو البرنامج أو نلغي جزء منه. هنبلغك في أسرع وقت، وهنحاول نقدم بديل مناسب. ولو في فلوس اتردتلنا بسبب التغيير، بنرجعها للمسافرين.
تجارب بره مصر
تذاكر الطيران والفنادق ورسوم التأشيرات غالبًا مش بتترد بعد ما تتحجز، فاسترداد الجزء ده بيبقى على حسب اللي نقدر نسترده من الجهات دي.
إزاي تطلب
كلمنا على الواتساب أو ابعت على hi@tba.eg، ومعاك رقم الإيصال. الاسترداد بيرجع بنفس طريقة التحويل، وهنقولك المعاد المتوقع.
4. أثناء التجربة
- التزم بالمواعيد وتعليمات الفريق والمرشدين، عشان التجربة تمشي كويس وآمنة للكل.
- احترم باقي المشاركين وأهل الأماكن اللي بنزورها. من حقنا نعتذر عن مشاركة أي حد بيأذي غيره أو بيعرض التجربة للخطر.
- لو عندك ظرف صحي أو محتاج حاجة معينة، بلغنا قبل التجربة.
- حاجتك الشخصية مسؤوليتك. لو ضاع منك حاجة، بلغنا من صفحة المفقودات وهنحاول نساعد.
- في تجارب بره مصر، جواز السفر والتأشيرة وشروط الدخول مسؤولية المسافر، واحنا بنساعد بالمعلومات.
- التجارب اللي ليها سن معين أو لياقة معينة، الشرط بيبقى مكتوب في صفحتها.
5. الصور
ده أسلوب سفرنا: بنصوّر التجارب وبننشرها أونلاين بكل تفاصيلها، عشان الناس تشوف التجربة زي ما هي بشفافية كاملة. الصور الجماعية بالذات بتتنشر.
- لو مش حابب تظهر، استبعد نفسك من الصور الجماعية أثناء التجربة، وقول للفريق عشان ياخدوا بالهم.
- تقدر تصوّر نفسك براحتك بعيد عن الصور الجماعية.
- لو لقيت صورة ليك لوحدك عايزها تتشال، ابعتلنا وهنشوفها.
6. الخصوصية: بنجمع إيه
- اسمك ورقم الواتساب والإيميل، لما تسجل على Luma أو تدفع من /pay أو تشترك في النشرة البريدية.
- إجاباتك على أسئلة التسجيل في Luma.
- صورة البطاقة أو جواز السفر، لو التجربة محتاجاها لتصاريح أو حجوزات.
- صورة التحويل اللي بترفعها على /pay. بتتحفظ في مكان مقفول على الموقع، ومش بيشوفها غير الفريق المسؤول عن الحسابات.
- بيانات زيارة عامة (زي الصفحات اللي اتفتحت ونوع الجهاز) من Google Analytics، بعد موافقتك على الكوكيز بس.
بنستخدمها في إيه
- مراجعة التسجيل، وتأكيد الدفع، وإيصالاتك، والتواصل معاك عن تجربتك.
- إيميلات عن تجارب جديدة ممكن تعجبك. في آخر كل إيميل لينك تلغي بيه الاشتراك في أي وقت.
- إننا نحسّن الموقع والتجارب.
مين بيشوفها
فريق Travel Buddies بالعربي، والخدمات اللي بنشتغل بيها: Luma للتسجيل، وGoogle Analytics، وbeehiiv للنشرة البريدية، وHostinger للاستضافة والإيميل، وGeidea لو دفعت عن طريقها (بيانات الكارت بتتدخل عند Geidea مباشرة، ومش بتوصلنا). وبنشارك اللي محتاجينه بس مع الجهات اللي بتنفذ التجربة، زي أسامي المسافرين للفندق أو شركة النقل. وأحيانًا بنحتاج نشارك صورة البطاقة أو جواز السفر مع جهات حكومية أو جهات بتنفذ التجربة، عشان تصاريح أو إجراءات لازمة للتجربة، وبنبعتها للغرض ده بس. مش بنبيع بياناتك لأي حد.
بنحتفظ بيها لحد إمتى
بنحتفظ ببيانات الحجز والدفع طول ما هي محتاجة للحسابات والتشغيل. ولو لغيت اشتراك الإيميلات، بنبطل نبعتلك.
حقوقك
تقدر تطلب تشوف بياناتك، أو تصلحها، أو نمسحها، بإيميل على hi@tba.eg. وتقدر تغير موافقتك على الكوكيز من «إعدادات الكوكيز» في آخر أي صفحة.
7. تواصل معانا
Travel Buddies بالعربي، مدينة نصر، القاهرة.
إيميل: hi@tba.eg · واتساب: +20 150 005 6989
ممكن نحدّث الصفحة دي من وقت للتاني، وتاريخ آخر تحديث بيبقى مكتوب فوق.
