انا عارف انك ممكن متعرفش تنطق أسامي البلاد اللي هنقولها في البوست او ممكن متكون سمعت عنها قبل كده بس صدقني لو بتفكر تسافر تستكشف دول جديدة متفوتش مغامرة مُنتصف آسيا علشان هنزور بلدين أحلى من بعض حاجة سبحان الله جنة الله على الأرض والجميل انهم بلاد بكر لسه مش معروفين أوي للسياحة ف الأسعار فيها بتكون منطقية والناس على طبيعتها وحقيقي هتبقى مغامرة مختلفة تماماً من نوعها 

مغامرة قيرغيزستان  وأوزباكستان  ( لا تراجع ولا استسلام )

عاوزين ناس نينجا عشان يطلعوا معانا المغامرة دي اللي 

هتبدأ إن شاء الله من دولة قيرغيزستان  وهنشوف فيها طبيعة رهيبة ، جبال من أحلى الجبال في العالم  وهيبقى عندنا تجربه رهيبة مع الخيل في الطبيعة  وبنفكر كمان نخيم يوم وسط الطبيعة هناك علشان نختلط بالبلد أكتر  طبعاً ده غير الهايك اللي هناك حاجة تانية خالص 

وبعدها هننطلق على وجهتنا التانية والأساسية والحب كله وطيبة الناس وجمالهم هناك اللي هتكون دولة أوزباكستان  وهنزور فيها مُدن زي سمرقند وبخاري (من أهم المدن الأثرية في العالم)  أوزباكستان يعني أصل ألف ليلة وليلة ، والمفاجأة أنك هتقابل “جُحا” وهتشوف أكبر المدارس والمساجد الإسلامية في العصور الوسطى في مدن أتولد فيها “ابن سينا والخوارزمي والإمام البخاري” وطبعاً مش هينفع نفوت الأكلات الشعبية هناك وخصوصاً (البلوف) 

 ندخل في المُفيد بقى 
 السفر هيكون يوم الإربعاء ١٠مايو والعودة يوم الأثنين 22 مايو (يعني 13 يوم)
 السفر والعودة من مطار القاهرة، والوزن 30 كيلو رايح راجع إن شاء الله 
 المُدن الي هنزورها إن شاء الله في قيرغيزستان  (بيشكيك) وفي أوزباكستان  (طشقند، بخارى، وسمرقند).
 لو حد من برا مصر سواء مصري أو أجنبي وحابب يسافر معانا يقدر يشاركنا ويقابلنا هناك نبدأ الرحلة سوا بس لازم يبلغنا ويملى الفورم طبعاً 
 عددنا هيكون في الأغلب 15 مُغامر علشان نقدر ننسبط كلنا ونلف براحتنا 🫱🏿‍🫲🏿
 الإقامة بتكون في فنادق من أول نجمة ل3 نجوم وشُقق فندقية وhostels والغُرف أحياناً بيكون فيها أكتر من 3 أشخاص.
 هنعمل activities كتير أوي وكل حاجة ممكن تتخيلها.

 البادجيت الي متوقعين نصرفها من 1000$ ل 1200$ حسب مصاريف كل واحد وحسب سعر الطيران الي هنحجزة.
 البادجيت الي متوقعينها بتشمل:
 الطيران الدولي من القاهرة لقيرغيزستان ومن قيرغيزستان لأوزباكستان والعودة للقاهرة
 الفيزا للبلدين
 الأكتفيتيز اللي هنعملها
 المواصلات
 الأقامة
 الأكل والشرب
 ماعدا الشوبينج طبعاً 

 الفيزا (بدون كشف حساب بنكي أوHr letter أو غيره):
– قيرغيزستان  أون لاين (E-Visa) وتكلفتها 50 دولار
– أوزباكستان  أون لاين (E-Visa) وتكلفتها 21.5 دولار

 محتاجين نأكد عليكم ونأخد بالنا من كام حاجة بس:
– الرحلة إستكشافية وكُلها مُغامرات وhike ومشي ومواصلات وتنطيط يعني مش رحلة رفاهية.
– أحنا بنسافر كل مرة علشان نروح نستكشف أماكن وحاجات جديدة فلازم يكون عندك تقبل للسفر بالطريقة دي.
– الرحلة غير مُناسبة للعائلات أو الأطفال أو كبار السن أو الشباب أو الأصحاب أو غير الأصحاب ( أقولك حاجة هي غير مُناسبة عموماً) 
– لو عدد الي سجلوا الفورم وصل ل100 واحد، هنشيل الفورم حتى لو بعد ربع ساعة 
– وارد البادجيت تزيد أو تقل لإنها رحلة إستكشافية وأول مرة نجربها بجروب.
– أحنا بنختار الناس الي تسافر معانا بدون أي نوع من أنواع التحيز لنوع أو جنس أو ديانة أو أي حاجة تماماً، لكن بنحاول نخلي الجروب يكون شبه بعض علشان نقدر نندمج مع بعض بسرعة وتكون مُغامرة جميلة نستمتع فيها كلنا سوا ونرجع منها أصحاب 
– لازم علشان تسافر معانا تبقى فاهم فكرة الجروب وأن أحنا بنسافر أصحاب ولو محتاج تاخد لفه في الجروب الأول وتشوف رحلاتنا الي قبل كده هيكون أفضل 
– علشان تكون معانا لازم تسجل في الفورم وهنرد عليكم في خلال 48 ساعة ونعرفكم باقي التفاصيل على الجروب الي بنعمله علشان نبدأ نجهز الورق والفيزا سوا